23. Dibarth Boromir

Kynsa Skrif - First Draft (updated to Gerlyver Meur 2nd edition)

 Aragorn a fistenas war-rag yn-bann an vre.  A dermyn dhe dermyn ev a omblegyas dhe’n dor.  Dewdroes hobbyt yw skav, ha nyns yw es dhe redya aga ol troes, dhe Bellgerdher keffrys, mes dhe bellder berr a’n gwarthav dowr fenten a dreusis an hyns hag y’n dor glyb ev a welas an pyth mayth esa ev ow hwilas.

‘My a red an ol yn ewn,’ a hanasas ev.  ‘Frodo a boenyas dhe benn an vre. Yth omwovynnav a’n pyth a welas ev ena.  Mes ev a dhehwelas y’n keth hyns, ha mos yn nans an vre arta.’

Hirgarr a hokyas.  Y fynnas ev y honan mos dhe’n gador ughel, dre wovenek a weles neppyth ena a wrussa gidyans dhodho yn y breder; mes termyn o skav.  Distowgh ev a lammas war-rag, ha poenya dhe’n barr, a-dreus an leghyon meur, hag yskynna an gradhow.  Ena, owth esedha y’n gador ughel ev a viras war-ves.  Mes an howl o tewlhes dell hevelis, hag an norvys o godewl ha pell.  Ev a dreylyas a-dro a-dhiworth an North bys dhe’n North arta, ny welas ev travyth saw breow a-bell, hag ev a dybis ev dhe weles, martesen, pell dhe-ves, edhenn veur arta haval orth er ughel y’n ayr, ow tiyskynna yn lent dre glyghyow ledan war-tu ha’n dor.

Poran hag ev ow lagatta y dhiwskovarn dynn a glywas sonyow y’n koes a-woeles dhodho, dhe du west an Avon.  Ev a hedhis stag.  Yth esa kriow, hag yn aga mysk, yn euthek, ev a allas klywes lev garow Orkow.  Ena, a-dhesempis korn meur a veu hwythys, faborden ha nerthek y alow, hag y lev a weskis orth an breow ha dasseni y’n kewyow, ow sevel haval orth garm veur a-ugh bedhyglans an dowrlamm.

 ‘Korn Boromir!’ a grias ev.  ‘Yma goredhomm dhodho!’  Ev a lammas yn-nans an gradhow ha war-rag, ow poenya yn unn lamma yn-nans an hyns.  ‘Elas!  Yma tenkys dhrog warnav y’n jydh ma, hag yma puptra a wrav vy ow treylya yn kamm.  Ple’ma Sam?’

‘Hag ev ow poenya an kriow a dheuth ha bos ughella, mes son an korn a dheuth isella lemmyn hag ynniadow.  Gwyls ha gluw y sevis garmow an Orkow, ha distowgh y hedhis galowyow an korn.  Aragorn a boenyas yn-nans an diwettha leder, mes kyns ev dhe alloes dos dhe ven an vre, an sonyow a iselhas y’n pellder; ev a dreylyas a-gledh ha poenya war-tu hag i, mes hag ev ow poenya i a gildennas, ha wor’tiwedh ny allas ev aga klywes namoy.  Ev a dennas y gledha splann yn unn arma Elendil! Elendil! hag ev ow tardha dre’n gwydh.

 A-dro dhe vildir a-dhiworth Parth Galen yn lannerghik ogas dhe’n lynn ev a gavas Boromir.  Yth esa ev owth esedha erbynn gwydhenn veur haval ev dhe bowes.  Mes Aragorn a welas y vos pychys gans meur a sethow du aga fluvennow; yth esa y gledha yn y dhorn hwath, mes ev o terrys nes dh’y dhornla; yth esa y gorn rybdho, treghys yn diw rann. Yth esa meur a Orkow ow korwedha oll a-dro dhodho hag orth y dhewdroes.

Aragorn eth war benn-dewlin rybdho.  Boromir a igoras y dhewlagas hag assaya kewsel.  Wor’tiwedh geryow lent a dheuth.  ‘Yth assayis vy synsi an Bysow diworth Frodo,’ yn-medh ev.  ‘Edrek a’m beus.  Tyli y hwrug.’  Y wowolok a wandras dh’y eskerens; yth esa ugens dhe gyns ow korwedha ena.  ‘I yw gyllys: an Hanterden: an Orkow re’s synsis.  Nyns yns i marow dell dybav.  Orkow a’s kelmis.’  Ev a hokyas ha’y dhewlagas a dhegeas yn skwith.  Wosa pols ev a gewsis arta.

‘Farwel, Aragorn!  Ke dhe Vinas Tirith ha sawya ow thus!  Fyllel a wrug vy.’

‘Na wrug!’ a leveris Aragorn, yn unn synsi y dhorn hag amma y dal.  ‘Ty re fethas.  Boghes gour re waynyas trygh a’n par ma.  Kav kres!  Ny wra koedha Minas Tirith!’

Boromir a vinhwarthas.

‘Pyth o aga fordh?  Esa Frodo ena?’ yn-medh Aragorn.

Mes ny gewsis Boromir namoy.

‘Elas!’ a leveris Aragorn.  ‘Yndella y tremen her Denethor, Arloedh Tour a With!  Homm yw diwedhva hwerow.  An Kowethyans yw distruys yn tien.  Yth yw my a fyllis.  Koeg o trest Gandalf ynnov.  Pandr’a wrav vy lemmyn?  Boromir re worras devar warnav dhe vones dhe Vinas Tirith, hag ow holonn a’n desir; mes ple’ma’n Bysow ha’n Deger?  Fatell allav vy aga havoes ha sawya an Negys a derroes?’

Ev a besyas war benn-dewlin dre bols, plegys yn unn oela, ow synsi orth dorn Voromir hwath.  Yndella y’n kavas Legolas ha Gymli.  I a dheuth a-dhiworth ledrow west a’n vre, yn taw, ow kreupya dre’n gwydh haval i dhe helghi.  Yth esa boel Gymli yn y dhorn, hag yn dorn Legolas y gollan hir: y sethow oll o devnydhys.  Pan dheuthons i y’n lannergh i a hedhis dre varth; hag ena i a sevis pols, plegys aga fenn dre alar, rag an pyth re hwarvia dhe heveli bos kler dhedha.

‘Elas!’ yn-medh Legolas, wosa dos ryb Aragorn.  ‘Y helghsyn ni ha ladra meur a Orkow y’n koes, mes y fien ni moy dhe les omma.  Y teuthen ni pan glewsyn an korn – re dhiwedhes, dell hevel.  Y hwodhevsowgh hwi pystigow marwel dell brederav.’  

‘Boromir yw marow,’ a leveris Aragorn.  ‘Yth ov vy anshyndys, drefenn nag esen vy omma ganso.  Ev a verwis yn unn dhefendya orth an hobyttow, ha my dhe-ves war an vre.’

‘An hobyttow!’ a grias Gymli.  ‘Ple’th esons i ytho?  Ple’ma Frodo?’

‘Ny wonn vy,’ a worthybis Aragorn yn skwith.  ‘Kyns ev dhe verwel Boromir a leveris orthiv an Orkow dh’aga helmi; ny dybis ev aga bos marow.  My a’n dannvonas rag sywya orth Merri ha Pyppyn; mes ny’n govynnis vy mar pe po Frodo po Sam ganso: kyns bos re dhiwedhes.  Puptra a wrug vy hedhyw res eth yn sowdhan.  Pandr’a wren ni lemmyn?’

‘Kynsa, y’gan beus res a dhyghtya orth an re yw koedhys,’ a leveris Legolas.  ‘Ny yllyn ni y asa ow korwedha avel karyn yn-mysk an Orkow blos ma.’

‘Res yw dhyn bos skon,’ yn-medh Gymli.  ‘Ny vynnsa ev may treynnyn.  Res yw dhyn sywya warlergh an Orkow, mars eus govenek bos nebonan a’gan Kowethyans keth bew.’

‘Mes ny wodhyn ni mars usi gansa an Bysowdeger,’ a leveris Aragorn.  ‘A wren ni y asa?  A ny goedh dhyn y hwilas yn kynsa?  Yma dewis drog a-ragon!’

‘Ytho, gwren ni kynsa an pyth a’gan beus res anodho,’ a leveris Legolas.  Ny’gan beus po termyn po toulyow rag yntirya agan koweth yn kwiw, po sevel krug a-ughto.  Karn y hallsen ni drehevel martesen.’

‘An oberenn a via kales ha hir: nyns eus meyn a yllsyn ni devnydhya nessa ages an dhowrlann,’ yn-medh Gymli.

‘Ytho, gwren ni y worra a’y rowedh yn skath gans y arvow, hag arvow y eskerens fethys,’ a leveris Aragorn.  ‘Y’n dannvenyn dhe Dhowrlamm Rauros ha’y ri dhe Anduin.  Avon veur Gondor a wra surhe, dhe gyns, ma na dhienorra kroadur tebel y eskern.’  

Yn skon i a hwilas yn-mysk korf an Orkow, ha kuntell warbarth aga kledhedhyow ha basnettow ha skoesow folsys yn bern.

‘Ott!’ a grias Aragorn. ‘Ottomma nosow!’  Ev a removyas diw gollan a-dhiworth an bern a arvow fell, furvys avel delenn aga lown, afinys gans liwyow owrek ha rudh; ha dre hwilas pella ev a gavas ynwedh aga goen, du, ynworrys gans gemmow rudh byghan.  ‘Nyns yns i toulyow-ork; an re ma!’ a leveris ev.  ‘I a veu degys gans an hobyttow.  Heb dout an Orkow a’s preydhas, mes yth esa own dhedha a witha an kollanow, dre aswonn an pyth yns i: oberennow Westernes, gwrys gans husennow rag diswrians Mordor.  Wel, lemmyn, mars yns i bew hwath, diervys yw agan kowetha.  Y fydhav kemmeres an draow ma, gans govenek erbynn an bys a’ga daskorr.’

‘Hag y fydhav vy kemmeres an sethow oll a allav vy kavoes, drefenn bos gwag ow goen-sethow,’ a leveris Legolas.  Ev a hwilas y’n bern ha war an dor a-dro ha kavoes lies seth o ankisys ha hirra aga gwelenn ages sethow a veu devnydhys herwydh usadow gans Orkow.  Ev a’s hwithras gans rach.

 Hag Aragorn a viras orth korfow an re a veu ledhys, ha leverel:  ‘Ottomma lies tus nag yw gwerin Mordor.  Nebes anedha re dheuth a’n North, a-dhiworth an Menydhow Niwlek, mars aswonnav yn hwir Orkow ha’ga aghow.  Hag ottomma re erell yw anaswonnis dhymm.  Nyns yw gwrys aga aparel warlergh gis Orkow vytholl!’

Yth esa peswar soudor-boekka, brassa aga ughelder, mindu, ledrek aga dewlagas, korfek aga diwarr ha bras aga diwdhorn.  Ervys ens i gans kledha berr ledan aga lown, yn le an kledhedhyow kamm o herwydh usadow gans Orkow; hag yth esa gwaregow a brenn ywin, haval orth gwaregow Gwer aga hirder ha’ga furv.  Orth aga skoes yth esa arwoedh goynt: dorn vyghan orth kres keyndir du; dhe dal aga basnet a horn yth esa gorrys run-S, gwrys a neb alkan gwynn.

‘Ny welis vy an arwoedhyow ma kyns,’ a leveris Aragorn.  ‘Pyth yw aga styr?’

‘S’ yw sin Sawron,’ a leveris Gymli.  ‘Henn yw es dh’y redya.’

‘Nag yw!’ yn-medh Legolas.  ‘Ny dhevnydh Sawron an runyow-Elf.’

‘Ynwedh, ny dhevnydh ev y hanow gwir, ha ny re ev kummyas y vos naneyl lytherennys na gewsys,’ a leveris Aragorn.  ‘Ha ny dhevnydh ev gwynn.  Orkow a soedh a-barth Barad-Dur a dhevnydh arwoedh Lagas Rudh.’  Ev a sevis pols yn unn dybi.  ‘S yw sin Saruman, dell dhismygav,’ yn-medh ev wor’tiwedh.  ‘Yma drogedh yn Horngastel, ha nyns yw salow an West nafella.  Herwydh preder Gandalf yw an dra:  dre neb fordh, nowdhow a’gan vyaj re dheuth dhe Saruman.  Gwirhaval yw ynwedh ev dhe wodhvos a-dro dhe vernans Gandalf.  Martesen pursiwyoryon a-dhiworth Mordor a dhienkas hewoelder Lorien, po goheles an pow na ha mos yn Horgastel der hynsyow erell.  Orkow a vyaj yn skon.  Mes yma fordhow pals a glewes nowodhow dhe Saruman.  A berthewgh kov a’n ydhyn?’

‘Wel, nyns eus termyn lowr dhyn rag tybi a-dro dhe idyansow-rim,’ a leveris Gymli.  ‘Perthyn Boromir dhe-ves!’

‘Mes, wosa henna, res vydh dhyn dismygi an gidyansow-rim rag may hyllyn ni dewis fordh yn telledhek,’ a worthybis Aragorn.

‘Nyns eus dewis delledhek martesen,’ a leveris Gymli.    

An Korr a synsis y voel ha treghi nebes skorrennow.  An re ma a veu kelmys warbarth gans kordennow-gwarek, hag i a lesas aga mantell a-dreus an fram.  War an vasken servadow ma i a dhug korf aga heskoweth dhe’n lann, ha ganso neb pewasow a’y dhiwettha batel a dhewissons i aga dannvon.  Hyns berr o, mes nyns o oberenn es ragdha, drefenn bos Boromir gour ha hir ha krev.

Aragorn a drigas orth an lann, ow kwitha war an vasken, ha Legolas ha Gymli ow fistena  a-droes dhe Barth Galen.  Pella ages mildir o an hyns, ha nebes termyn re dremensa kyns i dhe dhasweles, ow roevya diw skath yn skon a-hys an lann.

‘Yma hwedhel koynt dh’y leverel!’ a leveris Legolas.  ‘Yth esa diw skath hepken orth an lann.  Ny gevsyn ni an huni arall.’

‘A dheuth Orkow ena?’ a wovynnas Aragorn.

‘Ny welsyn ni lergh vyth anedha,’ a worthybis Gymli.  ‘Orkow a gemmersa an skathow oll, po aga distrui, ha’n fardellow ynwedh.’

‘Y fydhav mires orth an dor pan dhyffyn ni ena,’ a leveris Aragorn.

I a worras Boromir yn hworwedha yn mysk an skath a’n degsa dhe-ves.  An huk loes ha mantell elfek a veu plegys ha gorrys yn-dann y benn.  I a gribas y wols hir ha’y lesa war y dhiwskoedh.   An grogys owrek a Lorien a splannas a-dro dh’y gres.  Y vasnet i a worras rybdho, hag a-dreus y varlenn i a worras an korn folsys ha dornla ha skyrrennow y gledha; yn-dann y dhewdroes i a worras kledhedhyow y eskerens.  Ena wosa kelmi penn y skath dhe dhelergh an skath arall, i a’n tennas y’n lynn.  I a roevyas yn trist a-hys an lann, treylya y’n woeth skav ha tremena dres glesin glas Parth Galen.  Yth esa tuyow serth Tol Brandir owth issplanna: hanter-dohajydh o.  Hag i ow mos war-soth ethenn Rauros a sevis hag isterlentri a-ragdha, niwl a owr.  Taran hag uskisdros1 an dowrlamm a grenas orth an ayr diwyns.

Yn moredhek i a dhisynsas an skath-obis:  ynni y hworwedhas Boromir, kosel, hebask, ow slynkya war vronn an dowr ow pera.  An fros a’n synsis hag i ow fronna aga skath aga honan gans aga roevik.  Ev a neuvellas dresta, hag yn lent y skath a dhibarthas, ow lehe yn dyjynn du erbynn an golow owrek;   a-dhesempis hi a dhisomdhiskwedhas.  Rauros a besyas bedhgla anchanjys.  An Avon re synssa Boromir mab Denethor, ha nevra ny veu ev gwelys a-wosa yn Minas Tirith, ow sevel dell wre ev kyns war an Tour Gwynn myttinweyth.  Yn Gondor y’n dydhyow a-wosa leverys veu dre dermyn pell an skath elfek dhe dreusvewa dres an dowrlamm ha’n poll ow tarenna, ha’y doen war-nans dres Osgiliath, ha dres aberyow pals Anduin, y’n Mor Meur nosweyth yn-dann an ster.

Dre bols an tri heskoweth a besyas taw, yn unn lagatta war y lergh. Wor’tiwedh Aragorn a gewsis.  ‘I a vydh goelyas anodho a-dhiworth an Tour Gwynn,’ yn-medh ev, ‘mes ny vydh ev dehweles a-dhiworth an menydh po an mor.’  Ena, yn lent ev a dhallathas kana:

Dre Rohan ‘dreus an park ha’n kors may tyv an gwels yn toes

Gwyns an West a dheu yn kerdh, ow treylya ‘dro dhe’n fos.

‘Py nowodhow eus a’n West a dhredh y’n gorthugher ma?

A welsys jy Boromir Hir ‘dann stergann po loergann?’

‘Dres seyth gover y’n gwelis mos, dres dowrow down ha bas;  

Yn tiryow gwag y’n gwelis vy, bys kerdhas ev yn rag

Ny’n gwelis wosa ev dhe vos y’n skeusow tewl a’n North.

Martesen Gwyns an North a glewas korn mab Denethor.’

‘A Voromir! Y hwoelyen pell diworth an fosow men,

Ny wruss’ta nevra dos a’n tiryow gwag ma nag eus den.’  

Ena Legolas a ganas:

Y nij hwath Gwyns an Soth diworth an Mor ha’n tewynnow;

Y perth ev galow goelan ha dhe’n yet kyni a-dro.

‘Py nowodhow eus a’n Soth may tredh dell dheu an nos?

Ple’ma Boromir Hweg dhe wir? Y tar ha trist yth ov.’

‘Na bys ahanav vy an le – ‘ma eskern pals ‘derdro

Dhe’n vorlann wynn ha’n vorlann dewl yn-dann ebron hedro.

Meur a dus re sywyas Anduin troha’n Moryow gwynn.  

Pys a Wyns an North nowodhow a’n re ‘dhannvon ev dhymm!’

‘A Voromir! Yth a an fordh war-soth, war-tu ha’n Mor,

Ny dheuthys gans goelanes gwynn d’worth aber po arvor.’

Ena Aragorn a ganas arta:

A Yet Myghternyow ‘teu Gwyns an North, dres dowrlamm Rauros meur;

Ha lev y gorn yw klewys kler ha yeyn a-dro dhe’n tour.

Py nowodhow eus a’n North, hedhyw, a wyns mar grev?

Eus geryow a Voromir Hardh? Awos bos pell dhe-ves.’

‘D’worth Amon Hen lev kaskorn meur. Ev ‘dheuth er aga fynn.  

Y skoes folsys, y gledha brew, y hwrussons dri dhe’n lynn.

Y benn mar brout, y fas mar deg, y lev gyllys dison;

Y gorf ow powes, degys veu, gans Rauros war y vronn.

‘A Voromir! An Tour a With war-north lagatta byth

Dhe Rauros owrek, Rauros meur, bys y’n diwettha dydh.’

Yndella y hworfennsons i.  I a dreylyas aga skath ha’y lewya toeth men erbynn an fros war-tu ha Parth Galen.

‘Hwi a asas Gwyns an Est ragov vy,’ yn-medh Gymli, ‘mes ny leverav travyth yn y gever.’

‘Henn yw gwiw,’ a leveris Aragorn.  ‘Yn Minas Tirith i a berth Gwyns an Est, mes ny bysons i nowodhow a-dhiworto.  Mes lemmyn, yma Boromir war y fordh, ha res yw dhyn fistena ha dewis agan fordh agan honan.

Ev a arhwithras an glesin, yn skon mes yn kowal, ow kwargromma lieskweyth dhe’n dor.  ‘Nyns esa Ork vyth war’n dor ma,’ a leveris ev.  ‘Ny allav vy dismygi travyth moy yn sertan. Yma agan olow troes omma, ow treusi ha dastreusi.  Ny allav vy dismygi mar kwrug dehweles neb hobytt a-ban dhallethas an helgh rag Frodo.’  Ev a dhehwelas dhe’n lann, nes dhe’n le may tevera goverik an fenten y’n Avon.  ‘Yma nebes olow troes kler omma,’ yn-medh ev. ‘Hobytt a rysas y’n dowr ha dehweles; mes ny allav vy dismygi pes termyn o.’

‘Fatell gonvedhydh an dismyk ma ytho?’ a wovynnas Gymli.

Ny worthybis Aragorn a-dhistowgh, ev a dhehwelas dhe’n gampva ha mires orth an fardellow.  ‘Dew sagh yw gyllys,’ a leveris ev, ‘hag onan anedha yw dhe Sam: nebes bras ha poes o.  Hemm yw an gorthyp ytho: Frodo res eth dre skath, ha’y was res eth ganso.  Frodo a dhehwelas ha ni oll dhe-ves martesen.  My a vetyas gans Sam ha ni owth yskynna an vre ha leverel orto may siwyo ev war ow lergh; mes kler yw na wrug ev yndella.  Ev a dhismygis brys y vester ha dehweles omma kyns bos gyllys Frodo.  Nyns o es dhe asa Sam!

‘Mes prag y’gan gassa ev, ha heb leverel travyth dhyn?’ a leveris Gymli.  ‘Henn o gweythres koynt!’

‘Ha gweythres kolonnek,’ a leveris Aragorn.  ‘Sam a dybis yn ewn, dell dybav. Nyns o da gans Frodo dhe hembronkya neb koweth dh’y vernans ganso yn Mordor.  Mes ev a gonvedhas bos res dhodho y honan mos.  Neppyth a hwarva wosa ev dh’agan gasa; neppyth a fethas y own ha’y dhout.’

‘Y teuth er y bynn Okow owth helghi martesen hag y fias ev,’ a leveris Legolas.

‘Ev a fias, yn sur,’ yn-medh Aragorn, ‘mes ny wrug yndella a-dhiworth Orkow.’  Ny leveris Aragorn an pyth a dybis ev bos skila ervirans ha fo tromm Frodo.  Ev a withas yn kevrin diwettha geryow Boromir dre dermyn hir.

‘Wel, yth yw kler hemma dhe gyns,’ yn-medh Legolas:  ‘Nyns usi Frodo dhe’n tu ma an Avon lemmyn: yth yw ev an huni yn unnik a allsa kemmeres an skath.  Hag yma Sam ganso; yth yw ev an huni yn unnik a gemmersa y sagh.’

‘Agan dewis, ytho,’ yn-medh Gymli, ‘yw po kemmeres an skath yw gesys ha siwya warlergh Frodo, poken siwya an Orkow a-droes.  Nyns eus saw boghes govenek y’n unn fordh po hy ben.  Ni re gollas ouryow drudh seulabrys.’

‘Y tybav vy!’ a leveris Aragorn.  ‘Re wrylliv dewis ewn lemmyn, ha chanjya feus dhrog an jydh anlowen ma!’  Ev a sevis yn taw pols.  ‘Y holyav warlergh an Orkow,’ a leveris ev wor’tiwedh.  ‘Y kidsen vy Frodo yn Mordor ha mos ganso bys dhe’n gorfenn; mes mara’n hwilliv y’n gwylvos lemmyn, res via dhymm eskasa an gethyon dh’aga thorment ha mernans.  Ow holonn a gews yn kler wor’tiwedh: Feus an Deger yw dres ow delanwes lemmyn.  An Kowethyans re wrug y oberenn.  Mes ny yllyn ni, an re yw gesys, eskasa agan keskowetha ha genen nerth hwath.  Deun lemmyn!  Gesewgh puptra nag yw res!  Pesyn ha dydhweyth ha nosweyth!’

I a dennas an diwettha skath diworth an dowr ha’y dhoen yn mysk an gwydh.  I a worras yn-danno puptra a’ga gwara nag o res dhedha ha nag allsons i degi.  Ena, i a asas Parth Galen.  Yth esa an dohajydh ow tremena dhe-ves hag i ow tehweles dhe’n lannergh may koedhas Boromir.  Ena i a gavas ol an Orkow.  Nyns o res saw boghes a sleyghneth dh’y gavoes.

‘Ny wra tus erell trettyans a’n par ma,’ a leveris Legolas.  ‘Dell hevel y hwrons i delit dre hakkya ha gweskel dhe’n dor traow ow tevi nag esons i yn aga fordh keffrys.’

‘Mes i a wra toeth bras byttegyns,’ yn-medh Aragorn, ‘ha ny skwithons i.  Ha pella y’n helgh y fydh res dhyn hwilas agan fordh yn tiryow kales ha moel martesen.’

‘Wel, deun war aga lergh!’ a leveris Gymli.  ‘Korryon ynwedh a yll mos yn skon, ha ny skwithons i kyns Orkow.  Mes helgh hir y fydh:  pell war-rag yns i.’

‘Gwir,’ yn-medh Aragorn, ‘res vydh dhyn ni oll duryans Korryon.  Deun! Gans govenek po hebdho ni a wra siwya warlergh ol agan eskerens.  Ha go i, mars on ni skaffa!  Ni a wra helgh a vydh henwys marthus yn-mysk an Tri Neshevin: Elfow, Korryon ha Gwer.  War-rag an Tri Helghor!’

Haval orth karow ev a lammas war-rag. Dre’n gwydh y poenyas ev toeth men.  War-rag yn tidhiwedh ev a’s ledyas, anskwithys ha skav wosa bos kaleshes y vrys wor’tiwedh.  I a dremenas dres an koes a-dro dhe’n lynn.  Ledrow hir yth yskynnsons i, tewl aga linennans erbynn an ebron hag o rudh seulabrys dre howlsedhes. Mo a dheuth.  I a dremenas dhe-ves, skeusow tewl yn tir meynek.